Dumondas e respostas
Tut ils furniturs da servetschs da la chadaina da valurisaziun da 360º en la construcziun auta e la construcziun bassa che realiseschan projects d'immobiglias, d'infrastructura e d'ambient.
Purschiders dals secturs svilup, planisaziun, realisaziun, equipament, utilisaziun e restructuraziun e da las branschas cumplementaras.
Persunas privatas, patruns da construcziun e proprietaris d'edifizis publics ed instituziunals, sco era commembras e commembers activs e passivs.
La rait vul cuvrir prestaziuns referenziadas, directas ed indirectas lung la chadaina da valurisaziun da 360°. Cun lavuratoris, perfecziunaments, occurrenzas ed il barat d'infurmaziuns e datas relevantas rinforzan las commembras ed ils commembers lur cumpetitivitad.
Cun publicaziuns, la recrutaziun da talents e persunal qualifitgà e l'organisaziun da successiuns da firmas e d'assets sa porschan novas pussaivladads a las commembras ed als commembers da la rait.
Il medem mument segireschan els vinavant lur posiziun sin il martgà. Nossas commembras èn interpresas referenziadas, spezialistas en lur sectur, che cumpletteschan lur prestaziuns da cuminanza, resguardond adina la qualitad e fidadadad. Uschia cuntanscha la rait cooperativa ina relevanza signifitganta.
Lung ils ciclus vitals da projects d'immobiglias, d'infrastructura e d'ambient represchenta Future Areas ils secturs spezialisads a moda cumplessiva ed interdisciplinara:
La rait referenziada cun sias cooperaziuns vegn purtada da sias commembras e ses commembers cumpetents e da lur champs da fatschenta e vegn represchentada dals posts regiunals en l'entir pajais.
Tar Future Areas daventais Vus commembra u commember d'ina economia da construcziun productiva tenor il credo da las tecnologias nettas. La plattafurma promova la collavuraziun tranter las commembras ed ils commembers da la rait en tut ils secturs e sin tut ils nivels:
Sco organisaziun surregiunala statti a cor a Future Areas da tgirar las quatter linguas naziunalas.
Ella vul sustegnair las valurs culturalas, socialas ed economicas e resguardar ils differents interess e las aspectativas cun promover il barat local e regiunal.
Future Areas contribuescha a la solidaritad ed a l'egualitad da las schanzas sco elements caracteristics dal federalissem.
La rait porscha als patruns da construcziun ed a las investidras ed als investiders la pli gronda transparenza pussaivla ed in access effizient als furniturs da servetschs referenziads en l'entir pajais.
La rait facilitescha la procedura da decisiun da l'emprim contact fin a la conclusiun da l'incumbensa.
Las commembras ed ils commembers referenziads sa distinguan tras in'auta fidadadad e garanteschan uschia als patruns da construcziun ed a las investidras ed als investiders che lur cundiziuns da basa vegnan ademplidas en ina qualitad optimala.
Ils posts regiunals da Future Areas als permettan ultra da quai da contactar persunal dal fatg che cusseglia ed intermediescha.
La rait permetta ad architectas ed architects sco er als patruns da construcziun d'evaluar a moda simpla ed en tut las regiuns dal pajais ils furniturs da servetschs referenziads che sa distinguan tras resultats fidads d'auta qualitad. Sco incumbensadra u incumbensader survegnis Vus ina survista digitala da tut ils purschiders che correspundan a Voss criteris e pudais gist envidar quels online da suttametter in'offerta.
Sco furnitura e furnitur da prestaziuns pudais Vus As annunziar a moda simpla e digitala per ils projects publitgads. Sche Vus avais dumondas u vulais sclerir insatge, As stattan las represchentantas ed ils represchentants regiunals da Future Areas gugent a disposiziun.
La finamira da las publicaziuns è da correspunder ad autas pretensiuns da persistenza. Concernent il project e la dimensiun na datti naginas restricziuns. Per scleriments e cussegls As stattan las represchentantas ed ils represchentants regiunals gugent a disposiziun.
Nus envidain cordialmain mintga commembra e mintga commember da proponer occurrenzas, lavuratoris e cuntegns per il blog.
Vulais Vus preschentar in tema specific u realisar in agen lavuratori en Vossa regiun? Nus As sustegnain gugent. Tramettai Vossas propostas a contact@future-areas.swiss e nus ans mettain en contact cun Vus.
Uschia promova e rinforza la rait naziunala Future Areas il barat da savida surregiunal ed il contact persunal tranter sias commembras e ses commembers.
La qualitad da la rait sa basa sin la cumpetenza cumprovada da las spezialistas e dals spezialists e da las firmas, betg sin il dumber da commembranzas. La rait vegn tgirada da collavuraturas e collavuraturs spezialisads en ils posts da contact regiunals. Questas represchentantas e quests represchentants regiunals da Future Areas èn las persunas da contact per las commembras ed ils commembers e lur basegns individuals. Suenter ina collavuraziun reussida dattan las commembras ed ils commembers da la rait in a l'auter ina referenza ch'è visibla mo per els. Ultra da quai als permetta Future Areas da sa participar a lavuratoris, da profitar da coachings persunals e dad optimar lur prestaziuns cun sustegn da spezialistas e spezialists da process e da laschar accreditar ellas cun audits.
Las commembras ed ils commembers da Future Areas valiteschan ils resultats e las experientschas da lur collavuraziun cun in sistem dad 1 fin 6 stailas. Questa valitaziun vegn ad esser visibla mo per las commembras ed ils commembers da la rait. En cas da valitaziuns criticas gidan audits da qualitad interns da Future Areas a realisar mesiras da meglieraziun efficazias.
Commembra u commember pudais Vus daventar cun As registrar sin la plattafurma, respunder a las dumondas ed approvar il reglament da commembranza.
Cun pajar ina contribuziun annuala vegn Vossa commembranza activada automaticamain.
Las entradas vegnan duvradas per augmentar las cumpetenzas da la rait, per finanziar las activitads organisatoricas, administrar la plattafurma e transferir savida.
L'intent è da promover il dumber da participantas e participants lung la chadaina da valurisaziun da l'entira rait da Future Areas.
Future Areas n'incassescha naginas provisiuns da las activitads da fatschenta da sias commembras e da ses commembers.
Ulteriurs servetschs colliads cun custs – sper la contribuziun annuala – vegnan fatgs transparents da Future Areas.
Las commembras ed ils commembers sa distinguan tras lur savida spezialisada, lur cumpetenzas ed il fatg che tuttas e tuts partan las valurs persistentas da Future Areas.
Cun lur moda da pensar interprendenta, cun attenziun e premura, cun inspiraziun ed in'imaginaziun differenziada contribueschan las commembras ed ils commembers da Future Areas communablamain al success da l'economia da construcziun.